Monday, September 3, 2012

merdeka...merdeka..merdeka

selamat menyambut hari kebangsae, pejam celik doh 55 tahun bumi kito bebas dari penjajah. kito patut bersyukur dan menghargai nikmat kemerdekae yang kito telah nikmati sepanje 55 tahun nih. banyok kemajue dan perubohe telah kito alami. jange sio-siokan nikmat keamanae ni denge menghuru-harokae tanoh air kito denge bendo2 hok tok sepatutnyo.
baru-baru ni ado kes bakar bendero dan pijok gambar pm.....anok sapo la hok dok buat bendo2 bodo laguni. doh xdok kijo lain ko? kalu yo pun berbezo pahamae politik ko, pendapat ko, adokoh patut kito benarkae mudo-mudi kito buat perangai lagu ni? kalu insiden ni di"sponsor" oleh pihok2 tertentu, patut KDN amik tindakae tegas dan keras.
bagi la hukumae buang daeroh ko, lucut kerakyatan ko takpo ambo sokong. kalu puok2 raso dok toksir dudok di malaysia sangat biar puok2 dio berambus gi dudok negaro lain hok puok2 dio raso sesuai denge perangai dan pe'eil (perangai) lagu ni.
jange dok bui muko sangat, berani buat berani tanggung la. kalu raso anok jate gi la mohon lucut hak warganegara dan gi la pindoh ko negaro afrika ko kutub utaro ko hok bersesuaian dengannyo.....

Monday, September 19, 2011

tebalik kop

lamo doh tok nnulis, gatal tange la pulok raso. biaso la baru2 nok membiasokan diri denge suasano baru di tanoh tumpoh daroh ambo hok doh lebih 7,8 tahun ambo tinggal nih.
gapo namo tebalik kop tu? hok tebalik kop hok ambo maksudkan tu pasal isu ado ore nih pernoh jadi berito sensasi suato maso dahulu sebab mempermainkan lagu negaraku. maso tu satu malaya dok kutuk dio, siap keno panggil ko KDN lagi. pastu.....senyaaappppp.
alih2 baghu ni tubik satu cerito yang akan ditayangkan dan teko gapo dio? suksik2 rupo2nyo mamat tu tadi hok pernoh jadi isu kontroversi tu diangkat jadi pengarah filem tu.....pah lagumano tuh? meme caca merba, haru biru, terbalik kop semuo cukup.....patutla dulu ado bekas pembesar kito pernoh kato, "melayu mudoh lupo".......
komen ambo, bravo...bravo...bulih diamalkan selalu.....lain kali bagitau ko mudo mudi kito kalu nok berjayo dale hidup buat la huru hara di bumi malaya ni sekali ko duo tigo kali ko pun takpo sebab ore malaya nih mudoh lupo.....lepah tu ore malaya ni meme aloh denge ore hok ado publisiti, tok kiro lah publisiti baik ko buruk ko.....asal ore tu pernah ado publisiti terus dijulang, diangkat, seolah-olah gapo hok dio buat dulu takdok gapo. ter"maaf" denge sendirinyo bekalih......bulih jadi ni la hok ore dok kato..."matlamat menghalalkan caro".
oh malaya ku, kalu lagu ni sikap sebahagian besar rakyat malaya ni meme akan jahanam dan punoh ranoh la maso depe kito. harap2 pemimpin2 kito takdok mentaliti atau ppalo otok lagu ni...aminnnnnn.....

Monday, November 22, 2010

sobar...redho....

sejak dari kecik kito diajar ore melayu selalu keno sabar....kito ore islam, keno redho.....tapi sapa takat mano? sapa setaro mano nok keno sobanyo? kalu oghe asyik dok pijok ppalo kito, perah segalo kederat dan keringat kito? sekali duo takpo la weiii....sokmo2? pahtu tokke asyik kito jah keno soba, keno redho? pahtu tokleh laghi doh mesti ado jah hok nok jadi nasik tambohnyo dengan kato2 "sedangkan nabi ampunkan umat"......kecek sene....buat?
tapi itula realiti dalam hidup loni, oghe yang bodo dan jahil itulah loni diangkat jadi kepalo.....kijo x belah mano, ilmu xdok, skill xdok, harapke pengalame kjo yang kununnya doh berpuluh-puluh tahun tu.....
adola saing ambo komen, kalu pengalame jah puluh-puluh tahun tapi xdok ilmu wat gapo? harap naik atau maju denge jaso bodek, kipah, pijok memijok, tike menike wat gapo?
kato tok2 guru kito, itula tando2nyo dunio sudoh nok akhir zame....apabilo tibo satu saat dan maso banyak perkaro diuruskanoleh mereko yang bukan ahlinyo. gapo maksud dio tuh? ni la golonge yang berpura-puro tahu sedangkan mereko sebenarnyo tok tahu gapo satu. kalu ado niat nok gi belaja atau gi tanyo mereko yang lebih arif takpo la jugok...ni dok...dok hentam keromo situ jah. kononnyo biso sangat, konon2 dunio ini dio yang ampunyo....
kalu berlarute la keadoe laguni mako akan punoh ranoh la tanahiar kito. akan jahanam segalo apo yang telah dibino selamo ini. dan x mustahil akan tergadai bumi malaysia kito ini kepado anasir2 asing.
bilo berhadape denge maknusio2 lagu raso panah hati kakloh. raso nok sepak, nok seke jah ppalo sekor2. tapi tu la supo ambo ghpyak mulo2 tadi, kito oghe melayu ni ke keno soba?keno redho??????

Saturday, September 4, 2010

kepulange

lamo doh ambo tok menulih ataupun membuko blog ambo ni. almaklumla sibuk bedooh pahtu kepalo pulok dok serabut jah.
tapi loni ambo doh bulih tarik napas lego sebab akhirnya ambo akan balik ke tanoh air tempat tumpah daroh ambo untuk bertugas di sano pulok. syukur alhamdulillah segalo doa dan permintaan ambo dikabulkan oleh Yang Maha Esa. takdok perkatoe yang bulih menggambarkab betapo gembironyo hati ambo bilo mendapat arahe untuk balik semula ko malaysia.
harini 4/9/2010 merupoke satu tarikh keramat kerano hari ini adolah hari terakhir ambo dan keluargo ambo berada dibumi riyadh ini. pete nanti insyaallah ambo sekeluargo ake berangkat balik ke malaysia. balik "for good" kato ore putih ataupun "end of tour".
moga2 tiado lagi sebare halange yang akan menjelma. insyaallah.....

Saturday, February 13, 2010

di hutan disusukan yang di rumah kelaparan

gapo namo tuh yang di hutan disusukan yang dirumah kelaparan? ado peribahaso melayu kato, kero di hute disusuke nok dirumoh mati kelapare. bakpo tibo2 tubik peribahaso pulok? sebenarnyo ambo tertarik atas komen tun m maso pelancare "perkasa" selangor baru-baru ni.
antaro intipati ucapan tun dimano ore2 melayu sudah hile kepercayae kepado parti2 yang kononnya berjuang untuk nasib bangsa melayu tetapi akhir2 ni dilihat terlalu memberi perhatie kepado bangso lain sehingga mengakibatkan mereka2 ini yang berasa terpinggir beralih kepada NGO2 untuk menyampaikan hasrat dan membela nasib ore2 melayu yang seolah-olah terpinggir.
yolo atau tidok ambo raso kito tepuk dado tanyo selero. tak perlu la nok cari dale mano2 majalah atau suratkabar sebab tok ake tubik laporan atau artikel laguni. kito tengok dan kito raso, kalu ado ado, kalu takdok, takdok la.
supo ambo sendiri lamo doh ambo beraso berlakunyo 'excessive attention' diberikan kepado kaum2 lain sejok lepas pilihanrayo haritu lagi. kononnyo untuk menarik balik sokonge kaum2 lain untuk mengundi pado pilihanrayo ake date. baik dari kaler biru, hijau ataupun biru mudo, masing2 terkejar2 untuk memberike apo juo tuntute yang diutaroke tidok kiro logik atau tidok, mengikut lunas unde2 atau tidok dan samoado akan memberi kesan ko ore melayu atau tidok.
bagi ambo doh kuaso ditange demo, buat la gapo demo nok buat tapi ore melayu tidok bodo atau buto, kito ado mato, ado telingo dan yang paling penting ado akal fikire yang waras untuk menentuke yang mano baik yang mano burok.
ambo sebagai ore melayu toksir kelih tanoh tumpoh daroh nenek moye ambo jadi kacau bilau ataupun jatuh ke tange kaum lain kerano ketamoke dan kebodohe segelintir ore2 melayu yang lupo kepado asal usul dan amanah yang diberike.
nasihat ambo kalu tok reti memimpin gi masuk sekoloh balik atau gi tanyo kat ore2 lamo lagumano nok nok buat. kalu tok tahu nok jadi wakil rakyat jange jadi calon. dan untuk kito pulok bo la pakoh pok2 ni. ni gak meta2 lompat, meta2 lompat. pah dok baloh dale tv pakak dok bagi kenyatae mace2. nok cayo hok mano so pon tok tahu, tapi bagi ambo semo napok supo belako, hipokrit. kalu demo tu betul2 niat ikhlas untuk memperjueke nasib ore melayu ambo raso demo tok wak lagutu.
pelue untuk bersatu balik tu ado, yang penting masing2 keno mengaloh dan jujur untuk mencapai matlamat. tolok ketepi raso ego dale diri masing2, contohilah sejaroh rasullulah semaso perjanjie hudaibiyah gapo semo. kalu usaha betul2 insyaallah akan ado jale penyelesaie.

Monday, February 8, 2010

isu terhangat abad ini


isu gapo hok terhangat sangat2 nih? loni gak mace2 la hok berlaku. payoh nok bezoke antara hok nyato denge palsu. isu hok ambo nok sentuh ni pasal kes 'lawauta' antaro 'big' political figure negaro kito denge bekas pembantu peribadi dio.
kalu ore tanyo ambo hok mano agok2 hok benar? jawape ambo itu antara pengadu, yang diadu denge Allah SWT jah hok tahu. ado ore kato 'old habit die hard', itu betul kalu yang diadu tu meme ado tabiat lagu tu jak azali lagi. kalu takdok gak, mako mustahil la dio ake buat perilaku lagutu.
pahtu yang pengadu pulok, setakat mano bulih percayo atau tidok aduan dio tu samo2 la kito tunggu dan lihat.
bagi ambo kalu kito tok buat bendo saloh, nok takut wat gapo. tapi ado satu masaloh lagi denge sistem pengadile yakni bergantung atas biso setaro mano pok2 loyar pihak masing2 melontar dan memutarkan hujah. bakpo ambo kato melontar dan memutar? ado la makno dio tuh.
walau apo juo sebenarnyo yang berlaku yakni samoado aduan yang dibuat tu benar2 sahih ataupun merupoke satu 'political assasination', maso, tenago, segalo sumber dan wang rakyat banyok yang ake terbazir. apo2hal pun kito samo2 tunggu dan lihat.
wallahhuaalam.

Friday, January 22, 2010

tahun baru semangat pun baru

lamo doh ambo tok update blog ambo nih. buke apo sibuk bedooh denge kijo. pah pulok maso balik sini balik haritu ambo raso tok sedap hati. tok rajin lagi ambo tengok ayoh ambo sedih gitumolalu maso nok ngatar ambo anok beranok di airport maso nok mari bule 11 haritu.
hati ambodok asyik ddebar jah raso mace ado hok tok keno. pah maso rayo haji haritu kakok ambo tepon kato ayoh ambo masuk wad ccu. tu pun demo bagitau lepas 3,4 hari doh ayoh ambo masuk spital. buke apo, ayoh ambo ye pese jange bagitau sebab dio tok sir ambo runsing. pah pulok toksir bui ambo ggaduh kelik, maklumla duduknyo jauh beribu batu pah dio tahu saving ambo pun doh licin maso kelik rayo haritu.
lebih kure 11 hari ayoh ambo discas, doh bulih balik dumoh. ambo denga lagutu lego la sikit bilo adik beradik royak dio dok segar balik, pahtu make pun doh lalu balik.
rupo2nyo dio segar untuk bagi peluang dio selesaikan urusan2 terakhir dio.
bilo demo tepon bagitau ayoh ambo takdok doh, gelap semeta dunio raso. kelam kabut cari tiket nok balik. nasib baik, alhamdulillah dapat jugok tiket direct ke kota bahru. terkilan jugok la di hati tok sempat nak tengok arwah ayah kali terakhir. doh la maso dio dok dale wad haritu tokleh nok balik. tapi nok buat lagumano, laguni nasib ore merantau, doh rezeki ambo di luar negaro, ambo keno redho la atas segalo apo ye berlaku. mungkin ado hikmah di sebalik semua ye berlaku.
semale tahlil 40 untok arwah ayoh. moga2 dicucuri rahmat ke atas rohnya dan ditempatkan dia di kalangan orang2 yang beriman. amin.

Friday, September 11, 2009

asoh skill lamo



lamo doh ambo tok mmasok bergulai ssemo. sekali sekalo nok jugok jamoh gulai, ike bakar belako bule2 poso nih. semale ambo ajok sain2 hok tengoh buje bbuko poso. jadi bersilat la ambo nok mmasoknyo. dari pagi gi pasar beli ike sayur ssemo. balik dumoh, masok gulai aye masala dulu siap2, pete nanti tunggu nok ppanas jah. daging ptong siap2 pastu perap sipe dale peti sejuk dulu. lepas asar baru goreng untuk buat daging black pepper. ike cuci siap2 pastu buat inti nyior sumbat. beloh belake ike pahtu sumbat inti pah sipe dale peti sejuk jugok dulu untuk goreng pete nanti. untuk ike bakar pulok perap denge rempah dulu pah bukus denge daun pise. semo tunggu pete lepas asar baru nok bakar.
lamo tok mmasok laguni penat jugok, tapi bilo doh siap masok ssemo belako lego raso. terutamo sekali bilo tengok tetamu asyik menjamu selero, hapuh raso penat leloh belako. lagipun bui ko ore make bule poso ni besar fadilatnyo.

Saturday, September 5, 2009

dulu dan sekarang



alhamdulillah ramadhan kali ni ambo berpelue untuk gi buat umrah. ni kali pertamo ambo sambut ramadhan di Mekah. kali pertamo jugok buat umrah bule2 poso laguni. kebetule anok bini xdok jadi sene la sikit nok melangkohnyo.
mulo2 risau jugok sebab loni kes H1N1 belum redo lagi. ado jugok dengar2 ore2 hok gi umrah kena jangkitan bilo balik dari Mekah. apo2hal bendo ni atas niat belako. pastu usaha untuk langkah2 pencegahan keno la dibuat sekali. jange tawakkal buto tuli jah. keno pakai 'mask', pastu keno kerap basuh tange dll. alhamdulillah setat dari hari pertamo sampai balik takdok gapo2 berlaku. tahun ni napok tok ramai mano ore buat umrah, tapi bele2 tok ramai pun time nok semeye terawih denge semaye jumaat penuh sampai ko tingkat atas jugok. hotel2 semo dok mengeluh sebab dengar ceritonyo cumo 25% jah bilik ore tempah. kalu mace tahun2 lepas terutamo bule ramadhan hotel2 semo 'full swing', bilik sepanje bule penuh. hargo bilik pun melambung-lambung.
gambar atas tu Mekah 30 tahun dulu. ambo ambik dari gambar yangdigantungdekat hotel tempat amdo duduk. yang bawoh tu pulok gambar Mekah maso loni, yang ambo ambik dari tingkat 1 lepas siap buat saie.
letih? meme letih la buat umrah bule2 poso nih. lepas siap buat umrah lepas tahallul balik hotel terus tido. nok pengsan raso sebab sampai di Mekah pun dah pukul 8 pagi. lepas check-in terus gi buat umrah. tawaf dan saie semo dekat pukul 11.00 baru siap. kalu iman tok kuat, rasonyo adola hok gi togok air kot. patutla ado hadis kato mengerjoke umrah di bule ramadhan nih, pahalonyo samo supo buat haji. apo2hal ambo bersyukur sebab diberi pelue untuk buat umrah, solat terawih dan solat jumaat di masjidil haram di bule ramadhan tahun ni. pengelame laguni walaupun ado pitih 2,3 juto pun tokleh nok beli. alhamdulillah.

Wednesday, September 2, 2009

anasir perosak

http://www.bharian.com.my/Current_News/BH/Wednesday/Nasional/20090902020045/Article/index_html

sejok duo menjok ni mace2 berito sensasi kito dengar dale media tempate. link alik atah tu komen dari Raja Perlis. ambo raso meme ramai doh ore terperase bendo nih sebab kalu nok diikutke napok mace tok berapo sihat aktiviti denge suasano hok berlaku kebelakange nih.
hok terbaru isu perarake ke suk selangor denge membawo ppalo lembu. bilo berlaku lagutu puok2 hok gi buat perarake tu kato simbolik bawok ppalo lembu tu kerano alase lain, bukenyo untuk menyentuh sensitiviti kaum2 tertentu. tapi napok bodo pulok alase lagutu. sebelum buat keputuse nok bawok ppalo lembu tu nok gi berarok tokke la demo tu tok pikir makno dan persepsi lain yang mungkin timbul.
napok supo ado pihok sengajo nok wujudke suasano tidok sihat. puok2 tu claim kato nok perjue nasib ore melayu dan ore islam di kawase tu tapi ambo tok berapo nok bulih tele alase yang diberi oleh demo tu. pahtu ado pulok lapore kato ore tempate di kawase tu ado 4,5 ore jah hok g berarok sekali, tu pun tok tahu menahu pasal rancange untuk bowok ppalo lembu tu sekali dale perarake. pah guano?
katonyo islam belako, napok pakai ppioh denge serban tapi tu ko caro dale islam? pah tokke la demo tu tok terlintas ake maksud lain yang bulih diinterpretasi denge caro membawo ppalo lembu tu? nok kato bodo, napok gayo supo ngaji pah srp belako. ore kelate kato kalu ngaji pah srp tu kiro cudik doh la sikit. yo la ngaji pah sekoloh belako. tapi tokke la bendo tu tok leh nok pikir? yang ore lain ni napok terlintas jah dale tv demo tu berarok bawok ppalo lembu tu terus terlintas pasal sensitiviti agamo lain. kalu demo tu buat perangai laguni di kelate ambo raso lamo doh keno tipah ppalo ko ore kampung.
tu la ore kato, demo asas agamo pun tok kukuh pah guano nok berjue sambil menampilke imej islam? tok ngaji agamo ko? nabi pun kato maso perang dulu, jange hino simbol agamo lain lepas mene dale peperange. jange pakso ore lain masuk islam, sebab islam buke agamo paksae. umat islam keno respek ajare agamo lain sebab kito pun tok ake suko kalu ore lain hino agamo kito. hok keno diperangi nih kafir harbi jah, agamo lain asalke buleh saling hormat menghormati dan bulih hidup dale suasano harmoni, wajib kito jago demo nih, dok gitu?